मनोमानी शुल्क उठाएको भन्दै दुइ विद्यार्थी संगठनको आपत्ति

छाल खवर
धरान,१२ मंसिर ः अनेरास्ववियू धरान उपमहानगर कमिटीले निजी विद्यालयहरुले मनोमानी रुपमा शुल्क लिन थालेको प्रति आपत्ति जनाएको छ ।

साविक अनेरास्वयुका कार्यबाहक अध्यक्ष सौरव खड्का र साविक अखिल क्रान्तिकारीका कार्यवाहक अध्यक्ष घनश्याम थेवेले संयुक्त विज्ञप्ति प्रशासन गरी सो आपत्ति जनाएका हुन ।

धरानका निजी विद्यालयहरुले अभिभावकहरुलाई डरत्रास देखाएर मनोमानी ढंगले शुल्क बुझाउन दबाब दिएको दुइ संगठनले आरोप लगाएकाछन् ।

विद्यार्थी नेताहरुले मेयर तिलक राई र उपमेयर मञ्जु भण्डारी सुवेदीलाई विज्ञप्ती बुझाउदै मनोमानी शुल्क उठाइरहेकोप्रति उपमहानगरपालिकाको ध्यानाकर्षण गराएकाछन् ।

विद्यार्थीहरु भौतिकरुपमा विद्यालयमा उपस्थित नभएता पनि यातायात, खेलकुद, कम्प्युटर, ल्याबलगायत विभिन्न शिर्षकमा शुल्क असुल भइरहेको विद्यार्थी संगठनले जनाएको छ ।

कोविड–१९ को महामारीबाट परेको असरका कारण अभिभावकले शुल्क तिर्न समस्या भईरहेको अवस्थामा मनोमानी ढंगले शुल्क लिन दवाव दिनु व्यवहारीक नभएको समेत उनीहरुले बताएकाछन। ।