मेयर हर्क साम्पाङका विश्वास पात्र रमेश बान्तवा राई साइबर अपराधको आरोपमा पक्राउ

छाल खवर
धरान,२९ साउन ः धरानका मेयर हर्क साम्पाङका विश्वास पात्र मानिएका रमेश बान्तवा राई सामाजिक सञ्जाल प्रयोग गरी गालीगलौज गरेको आरोपमा पक्राउ परेका छन् ।

प्रहरीले उनलाई धरान–५ देउराली स्थित उनको घरबाट आइतबार पक्राउ गरेको हो ।
इलाका प्रहरी कार्यालय धरानका डिएसपी नवराज मल्लले जिल्ला प्रहरी कार्यालय सुनसरीको पत्र अनुसार राईलाई नियन्त्रणमा लिएको बताएकाछन् ।
केही समय अघि धरान–४ स्थित छोटी मोरङ जग्गा पीडित संघर्ष समितिले पत्रकार सम्मेलन गरेको समाचार प्रकाशित भएपछि मेयर साम्पाङ समर्थक राईले संघर्ष समितिका सदस्य पर्वत राईलाई व्यक्तिगत आक्षेप लगाई सामाजिक सञ्जालमा गाली गलौज गरेका थिए ।
जग्गा पीडित राईले गत साउन १५ गते साइबर क्राईम अन्तर्गत जिल्ला प्रहरी कार्यालय सुनसरीमा उजुरी दर्ता गराएका थिए । सोही मुद्दामा जिल्ला कार्यालय साइबर ब्युरोको टोलीले साइवर अपराधमा राईलाई पक्राउ गरेको इलाका प्रहरी कार्यालयले जनाएको छ ।
राई मेयर साम्पाङलाई कुनै समय पार्टी खोल्न उकास्ने व्यक्ति हुन । जसको उस्काहटमा साम्पाङले एकता संजाल नामक संस्था स्थापना गरेका थिए । सोही संस्थालाई पार्टीको रुपमा अघि वढाउने तयारी समेत गरेका थिए । तर उनले पछि पार्टी भने खोलेका थिएनन् ।
राई युनिटी नामक नेटवकिङ व्यवसायमा समेत लागेर धेरै मानिसलाई डुवाएको आरोप लाग्दै आएको छ ।केही महिना अघि साम्पाङले राईलाई धरान नगरपालिाको राजश्व संकलनमा जागिरे नियुुक्ति गरेका थिए ।