उदयपुरमा पहिरोको कारण सडक अवरुद्ध

असार ३

उदयपुर÷ लगातारको वर्षासँगै पहिरो झर्न थालेपछि उदयपुर जिल्लाको मध्य–उत्तरी पहाडी क्षेत्रसम्म जोड्ने सडक अवरुद्ध भएका छन्।
सदरमुकाम गाईघाट, मुर्कुची पुवारे, माझखर्क हुँदै उत्तरी पहाडी क्षेत्रको लिम्चुङबुङ गाउँपालिका जोड्ने सडकमा पहिरो खसेपछि सडक अवरुद्ध बन्न पुगेको हो।
लिम्चुङबुङ गाउँपालिकाका अनुसार मुर्कुची, माझखर्क हुँदै लिम्चुङबुङको बासबाटे, सातदोबाटे, बराह, ताम्लीछा तथा जाँते र बलाम्ता गाउँहरु जोड्ने सडक पहिरोका कारण अवरुद्ध बन्न पुगेको छ । त्यसक्षेत्रका थुप्रै स्थानहरुमा पहिरो खस्नुका साथै रुखहरु ढलेर चार दिनदेखि यस क्षेत्रको सडक अवरुद्ध भइरहेको छ ।
गाउँपालिकाका उपाध्यक्ष रमिला राईका अनुसार सडक अवरुद्ध हुदा विरामी लान र अति आवस्यक दैनिक खाद्यान्न सामाग्री लान समेत समस्या भएको छ ।