कांग्रेसको अवरोधका कारण प्रदेश १ को प्रदेशसभा स्थगित

छाल खवर

असार ८ विराटनगर ः प्रतिपक्ष दल नेपाली कांग्रेसको अवरोधका कारण प्रदेश नंं.१ को प्रदेशसभाको सोमवारको बैठक स्थगित भएको छ । सभामुख प्रदीपकुमार भण्डारीले शून्य समयको कार्यक्रम प्रारम्भ गर्न लाग्दा प्रमुख प्रतिपक्ष नेपाली काँग्रेसका सांसदहरुले उभिएर विरोध जनाएपछि वैठक स्थगित गरीएको हो ।

सभामुख भण्डारीले पटक÷पटक सांसदहरुलाई आसन ग्रहण गर्न आग्रह गर्नुभएता पनि अस्विकार गरेका थिए । काँग्रेसका प्रदेशसभा सदस्यलाई बोल्न समय दिएपछि प्रमुख सचेतक केदार कार्कीले संसदमा उठेका प्रश्नहरुको मुख्यमन्त्री शेरधन राईले जवाफ दिनुपर्ने नभए संसद् चल्न नदिने अडान लिनु भएको थियो । उहाँले सरकारले कोरोना उपचार, रोकथाम एवं नियन्त्रणमा गरेको खर्च सार्वजनिक गर्नुपर्ने माग समेत गर्नुभएको थियो ।

सचेतक कार्कीले प्रदेश सरकारको सचिव काठमाडौँ जाँदा प्रमुख जिल्ला अधिकारीसँग अनुमति पत्र लिनुपर्ने कुराको चर्को विरोध गर्नुभयो । सरकारले यसै अधिवेशनमा प्रदेशको नामकरण गर्नुपर्ने र सार्वजनिक यातायात व्यवसायी तथा मजदुरहरुको समस्यालाई उचित सम्बोधन हुनुपर्नेमा माग समेत गर्नुभएको थियो ।

मंगलवार सदनमा मुख्यमन्त्री शेरधन राईले जवाफ दिने आश्वासन प्राप्त भएको सूचनालाई पनि सांसदहरुले नमानेपछि असार ९ गते दिउँसो १ बजे संसद्को अर्को बैठक बस्ने सभामुख भण्डारीले जानकारी दिनुभयो ।नेपाली कांग्रेसले प्रदेशको नामाकरण गर्न बारम्वार माग गर्दै आएको छ ।