संयुक्त दलित संघर्ष समिति धरानद्वारा आन्दोलन घोषणा

छाल खवर
असार,९ असार ः विभिन्न स्थानमा दलित माथि भएको हत्याका घटनाको विषयमा धरानमा संयुक्त दलित संघर्ष समितिले शान्तिपूर्ण धर्ना कार्यक्रम गर्ने भएको छ ।
पश्चिम रूकुमको चौरजहारीमा भएको विभत्सपूर्ण घटना, अंगिरा पासीको बलात्कार पछि हत्या र शम्भु सदाको प्रहरी हिरासतमा भएको हत्या प्रकरणको विरोधमा संयुक्त दलित संघर्ष समिति धरानले खबरदारी पूर्ण धर्ना कार्यक्रम गर्ने भएको हो ।
समितिले मंगलवार धरानमा दलित अगुवा , बिभिन्न राजनीतिक दलका दलित नेताहरु , दलित अधिकारकर्मी , जनप्रतिनिधीहरु र दलित पत्रकारहरु सङ्ग छलफल गरी भोली असार १० गते बुधवार गर्ने आन्दोलनको कार्यक्रम तय गरेको समितिका संयोजक गंगा कालिकोटेले जानकारी दिनुभएको छ ।
समितिले नवराज बिक सहित ६ जनाको हत्यामा संलग्न दोषीलाई बिभिन्न राजनीतिक आडमा उन्मुक्ती दिन बिभिन्न बहाना बाजी गर्न थालेको हुनाले दोषीलाई हदैँ सम्मको सजायको माग राख्दै सिट्टी जुलुस गर्ने निर्णय भएको सचिव गमबहादुर लम्जेलले बताउनुभयो ।
दलित माथिको यस्ता घटना निरन्तर दोहोरीएकोले आन्दोलन गर्न बाध्य हुनु परेको दलित अधिकारकर्मी तथा दलित अगुवा तारा लाम्गादेले वताउनु भयो ।
यस्तै नेकपा नेता दलित अधिकारकर्मी डिबी शंकरले यो मुद्दा लाई मोड्न खोजे आफ्नो पार्टी भन्दा माथि उठेर गृहमन्त्रीको राजिनामा माग्न समेत आफुहरु तयार रहेको जिकिर गर्नुभयो । उहाले यो मुद्दालाई पार्टी सङ्ग जोडेर कमजोर बनाउने कुरामा आशंका नगर्न आग्रह गर्नु भयो ।
छलफलमा नेपाली काङ्ग्रेसका गोबिन्द बिकले अहिले समितिले नवराज बिकको मुद्दा मात्र हैन अन्य दलित जाती र समुदायसँग जोडीएका मुद्दाहरुलाई उठान गर्नु पर्ने बताउनुभयो । छलफलमा दलित अगुवा रमेश गजमेरले पहिलेको र अहिलेको आन्दोलनको स्वरुप नबदलिएको भन्दै अबको युवाहरुले सशक्त आन्दोलनको दवाव श्रृजना गर्नुको बिकल्प नरहेको दावी गर्नुभयो । समापनमा वोल्दै समिति संयोजक कालिकोटेले दलित समुदाय माथि भएको अन्याय विरूद्ध राज्य मौन बसेको कारण यो आन्दोलन गर्नुपरेको बताउनु भयो ।

उहाले यदि घटनाको दोषीलाई उन्मुक्ति दिलाउन सरोकारवाला नै अग्रसर रहन्छन् भने दलित समुदायले शसक्त संघर्षमा उत्रनुको विकल्प नभएको चेतावनी दिनुभयो ।उहाले यस्तो बेलामा दलितहरुको एकताको खाचो औल्याउनुभयो । बुधवार(भोली) दिनको ३ बजे भानुचोकमा भेला भएर सिट्टी फुक्ने कार्यक्रम रहेको सचिव लम्जेलले जानकारी दिनुभयो ।