हल्दिबारीको गाउँसभामा कुटाकुट

छाल खवर
धरान, ११असारः यतिबेला नगर सभा र गाउसभा बसेर नीति तथा कार्यक्रम बनाउन नगरपालिका र गाउपालिकालाई चटारो भइरहेको बेला एक स्थानीय निकायमा भने गाउसभामा कुटाकुट भएको छ ।
झापाको हल्दिबारी गाउँपालिकाको गाउँसभामा कुटाकुट भएको छ । सभामा सहभागी रहेका गाउँसभाका केही सदस्यले अध्यक्ष रविन्द्र लिङ्गदेनलाई मुक्का प्रहार समेत गरेको बुझिएको छ ।
लिङदेनको अहिले भद्रपुरस्थित मेची अस्पतालमा उपचार भइरहेको छ ।
आक्रोशित सदस्यहरुले कुर्सी, टेबल पनि भाँचिदिएको प्रत्यक्षदर्शीले बताएकाछन् ।
अध्यक्ष लिङ्गदेनले गाउँसभा बिथोल्न आएका अराजक व्यक्तिकोे आक्रमणबाट झ्याल, ढोका, टेबल कुर्सीलगायत कार्यालयका भौतिक संरचनामा क्षति पुगेको वताएकाछन् ।
उनले नेकपाबाट निर्वाचित गाउँ सभा सदस्यबाट आक्रमण भएको आरोप लगाएका छन् ।
गाउँ सभामा प्रस्तुत नीति तथा कार्यक्रमका अन्तरवस्तुमा सभा सदस्यसँग सुझाव संकलन गर्ने क्रममा विमति सिर्जना भएपछि एकैपटक आक्रमण सुरु भएको उनको भनाइ रहेको छ ।
यता गाउँपालिकाका वडा नम्बर ३ का अध्यक्ष त्रिलोचन सापकोटाले अध्यक्षकै डिजाइनमा गाउँ सभा भाँडिएको आरोप लगाउदै अध्यक्ष लिङ्गदेनले नेकपाबाट निर्वाचित गाउँ सभा सदस्यबाट आक्रमण भएको भन्ने आरोपको औचित्य पुष्टि गर्न चुनौती समेत दिएकाछन् ।
ज्ञापन पत्र बुझाउन आएकाहरुसंग विवाद भएपछि अध्यक्ष लिङ्गदेन सभा विसर्जन नगरी बाहिरिएका थिए । त्यसपछि उपाध्यक्ष डम्बर गिरीको अध्यक्षतामा सभा सञ्चालन भएको थियो ।
हल्दिबारीमा बहुमत कार्यपालिका सदस्य नेकपाका रहेका छन् ।