धरानका निजी विद्यालय आइतबार देखि खुल्ने प्राविको ४ र ५ र माविको ८,९,१० मात्र खुल्ने

छाल खवर
धरान,२० मंसिर ःविगत नौ महिना देखि वन्द रहेको धरानको नीजि विद्यालयहरु आगामी आइतवारदेखि खुल्ने भएकाछन् ।

कोरोना महामारीको कारण बन्द रहेका धरानका निजी तथा संस्थागत विद्यालयहरू आइतबार देखि खुल्ने भएका हुन् ।

निजी तथा संस्थागत विद्यालयहरूले उपमहानगरपालिकालाई ७ वटा मोडालिटी बुझाएको र सोही मोडालिटी अनुसार विद्यालय खोल्न भनेर उपमेयर मञ्जु भण्डारी सुवेदीले मौखिकरुपमा भनेकोले आइतबार देखि विद्यालय खुलाउने तयारी भईरहेको एसिसि धरान अध्यक्ष राजेन्द्र गुरुङले जानकारी दिएकाछन् ।

स्वास्थ्य प्रोटोकलको पालना गरी आइतबार देखि प्रावि तहका ४ र ५ कक्षा र मावि तहका ८,९ र १० कक्षाका विद्यार्थीहरूलाई पढाइने अध्यक्ष गुरुङले बताए ।

गुरुङका अनुसार विद्यालय खुल्दा विद्यार्थी सङ्ख्या कम भए एक सिफ्ट र धेरै भएमा २ सिफ्टमा कक्षा सञ्चालन हुनेछ ।

ट्रायलका लागि माध्यामिक विद्यालय सञ्चालन भएका विद्यालयहरुले ८,९,१० र प्राथमिक विद्यालय मात्र भएका स्कुलले ४ र ५ कक्षा सञ्चालन गरीने भएको छ ।

कक्षा पुरै समय नभई बिहान १० बजे देखि १ बजे सम्म र १ बजे देखि ४ बजे सम्म दैनिक ३ घण्टाका दरले दुई सिफ्टमा कक्षा सञ्चालन गरीने तयारी भईरहेको विद्यालयहरुले जनाएकाछन् ।विद्यालयले स्कुल बस र टिफिन भने सञ्चालन नगर्ने भएकाछन् ।

विद्यालय सञ्चालन गर्दा अनिवार्य मास्क, स्यानिटाइजरको व्यवस्था र एउटा बेन्चमा २ जना मात्रै विद्यार्थी राखेर कक्षा सञ्चालन गरीने भएको छ ।यो अभ्यास सफल भएको अवस्थामा अन्य कक्षाहरु समेत शुरु गरीने भएको छ ।