श्रम संस्कृति पार्टीको वरिष्ठ नेता बने सुदन किराती

छाल खवर
धरान,२५ वैशाखः लामो समयको रस्साकस्सीपछि अन्तत सुदन किराती हर्क साम्पाङ नेतृत्वको श्रम संस्कृति पार्टीमा वरिष्ठ नेताको जिम्मेवारी पाउने सहमति भएको छ ।
विहिवार रातिसम्म भएको दुवै पक्षवीचमा भएको सहमति अनुसार सुदन किरातीले श्रम संस्कृति पार्टीमा बरिष्ट नेताको जिम्मेवारी पाउने सहमति भएको हो ।
सहमति अनुसार सुदन समूहलाई श्रम संस्कृति पार्टीमा १ उपाध्यक्ष, १ सचिव र १५ जना केन्द्रीय सदस्य पाउने सहमति भएको किराती पक्षका एक नेताले जानकारी दिएकाछन् ।
श्रम संस्कृति पार्टीका अध्यक्ष हर्क साम्पाङ र पूर्वमाओवादी नेता किरातीबीच यस सम्बन्धी सहमति बिहीबार राति ललितपुरमा भएको थियो । उनीहरुले काठमाडौंको बागबजारमा औपचारीक कार्यक्रम गरी पार्टी एकताको औपचारिक घोषणा गर्दैछन् । एकता घोषणा कार्यक्रम अपराह्न तीन बजे बागबजारको हार्दिक होटलमा राखिएको छ ।
भोजपुरका सुदन किराती पूर्वमाओवादी नेता हुन् । उनी पर्यटनमन्त्री समेत बनेका थिए । तर, जेनजी आन्दोलनपछि प्रचण्ड, माधव नेपालसहितका नेताहरुले पार्टी एकता गरेर नेपाल कम्युनिस्ट पार्टी गठन गरेपछि त्यसमा असहमत हुँदै उनी प्रगतिशील लोकतान्त्रिक पार्टी (प्रलोपा)मा लागेका थिए ।
माओवादीका पूर्वउपमहासचिव जनार्दन शर्माको पहलमा खोलिएको प्रलोपामा सुदन किराती पाँच सदस्यीय अध्यक्ष परिषदको एक सदस्य थिए । २१ फागुनको निर्वाचनपछि भने उनले पार्टी परित्यागको घोषणा गरेका थिए ।