साहित्यकार भीम विरहीलाई युद्ध साहित्य पुरस्कार

छाल खवर
धरान,१२ वैशाख ः साहित्यकार कवि भीम विरही राईलाई ‘युद्ध साहित्य पुरस्कार–२०८२’ प्रदान गरिएको छ ।

आयोजकले धरानमा कार्यक्रमको आयोजना गरी राईलाई नगद ५० हजार रुपैयाँ राशी सहित पुरस्कार प्रदान गरेको हो ।

बेलायतको युद्ध साहित्य पुरस्कार कोषद्वारा राईलाई उक्त पुरस्कार प्रदान गरिएको थियो ।

प्रमुख अतिथि प्राज्ञ मुनाराज शेर्माले विश्व इतिहास युद्ध र सङ्घर्षबाटै निर्माण भएको चर्चा गर्दै विभिन्न कालखण्डका युद्धहरूले वर्तमान राजनीतिक तथा सामाजिक व्यवस्थाको जग बसालेको बताए । नेपालको राजनीतिक परिवर्तनहरू पनि सङ्घर्षकै परिणाम भएको उनको भनाई रहेको थियो ।

युद्ध साहित्यले हजारौँ वर्षअघिका धार्मिक युद्धदेखि आधुनिक युद्धसम्मका उपलब्धि, समस्या तथा योद्धाहरूको योगदानलाई उजागर गर्ने काम गरेको शेर्माले वताए । वर्तमान समयमा युद्धको स्वरूप परिवर्तन हुँदै डिजिटल युद्धको अवधारणा विकसित हुँदै गएको उनको भनाई थियो ।

वक्ताहरू जनकऋषि राई र डाक्टर अस्मिता विष्टले नेपाली साहित्य, विशेष गरी युद्ध साहित्य क्षेत्रमा राईले पुर्‍याएको योगदानको उच्च प्रशंसा गरे । युद्ध सम्बन्धी विषय वस्तुलाई साहित्यमा प्रयोग गरेर राईले महत्त्वपूर्ण भूमिका खेलेको उनीहरूको भनाई थियो ।

युद्ध साहित्य पुरस्कार कोषले साहित्यको प्रवर्द्धन तथा स्रष्टाहरूको सम्मानका लागि पुरस्कार स्थापना गरिएको आयोजक संस्थाका नरेश काङमाङले जानकारी दिए ।

सोही अवसरमा भएको छलफलमा गोर्खाली सैनिकहरूले विभिन्न मुलुकमा देखाएको वीरता तथा उनीहरूले भोगेका अनुभवहरूलाई साहित्यमा समेट्नु आवश्यक रहेकोमा सहभागीहरूले जोड दिए । उग्रवाद र ‘ब्यान्डिट’ जस्ता प्रवृत्तिबारे समेत चर्चा गरिएको थियो ।