बुढासुब्बा गोल्डकप फागुन १३ देखि हुने

छाल खवर
धरान,३ माघ ः धरानमा हुदै आएको अन्तरर्राष्ट्रिय बुढासुब्बा टुबोर्ग गोल्डकपको २३ औं सँस्करण आगामी फागुन दोस्रो सातादेखि हुने भएको छ । 

प्रतियोगिता आयोजक धरान फुटबल क्लबले मंगलवार एक प्रेस विज्ञप्ति जारी गर्दै प्रतियोगिता आयोजना गर्ने वारे जानकारी गराएका हुन ।

क्लवका अध्यक्ष किशोर राईले २ बर्षदेखि हुन नसकेको प्रतियोगिताको २३ औं सँस्करण फागुन १३ देखि २० गतेसम्म आयोजना गर्ने विज्ञप्ती मार्फत जानकारी दिएका छन् ।

प्रतियोगितालाई सम्पन्न गर्न सचिवालय र विभिन्न उपसमितिहरु पनि गठन गरिएको अध्यक्ष राईद्धारा विज्ञप्तीमा उल्लेख गरीएको छ ।

विज्ञप्तिका अनुसार अध्यक्ष किशोर राईको अध्यक्षतामा पदाधिकारीहरु रहेको सचिवालय गठन गरिएको छ ।

प्रतियोगितालाई थप प्रभावकारी वनाउन नविन राई संयोजक रहेको आर्थिक उपसमिति, प्रताप तामाङ संयोजक रहेको प्रचारप्रसार उपसमिति, सुदिप उप्रेती संयोजक रहेको मैदान व्यवस्थापन उपसमिति र रोमी मोक्तान संयोजक रहेको आयोजक टिम तयारी उपसमिति गठन भएको विज्ञप्तिमा उल्लेख गरीएको छ ।

आयोजकका अनुसार प्रतियोगितामा सहभागीताको लागि काठमाण्डौंका एक डिभिजन क्लबहरु, भारत र मोफसलका उत्कृष्ट क्लबहरुसँग सम्पर्क भइरहेको तर निर्णय हुन बाँकी रहेको छ ।

२०५५ सालदेखि निरन्तर हुदै आएको बुढासुब्बा गोल्डकप विगत २ बर्ष यता भने हुन सकेको छैन ।