२३ औं बुढासुब्बा टुबोर्ग गोल्डकपको पहिलो खेलमा कर्साङसँग आयोजक धरान पराजित

छाल खवर
धरान,१४ फागुन ःशनिवारबाट शुरु भएको २३ औं बुढासुब्बा टुबोर्ग गोल्डकपको पहिलो खेलमा आयोेजक धरान भारत कर्साङको युकेएफसिसँग पराजित भएको छ ।

शनिवार भएको उद्घाटन खेलमा टाइब्रेकरमा ५–३ ले आयोजक धरान फुटवल क्लव युकेएफसिसंग पराजित भएको हो ।

धरान १६ स्थित रंगशालामा शनिबार भएको उद्घाटन खेलमा निर्धारित समयको खेलमा दुवै टिमबाट कुनै खेल हुन नसकेपछि सिधै टाइब्रेकर भएको थियो ।

टाइब्रेकरमा कर्साङका तर्फबाट सिद्धान्त क्षेत्री, सुब्रत सोरेन, साहिल राई, आकाश प्रधान र राज राउतले गोल गरेका थिए ।

यता धरानका खेलाडीहरु दोर्जे तामाङ, मदन लाबुङ र रोमन लिम्बुले टाइब्रेकरमा गोल गरेपनि विजयको यात्रा तय गर्न भने असफल भएका थिए ।

खेलको म्यान अफ दि म्याच कर्साङका गोलकिपर मनोज प्रधान घोषित भए । उनले नगद १० हजार पाए भने उद्घाटन खेलमा ब्रिटिश गोर्खा बिग्रेड ब्याण्डकोतर्फबाट थप २५ हजार गरि कुल ३५ हजार नगद पुरस्कार पाउन सफल भएका थिए ।

प्रत्येक खेलको म्यान अफ दि म्याच खेलाडीले नगद १० हजार पाउनेछन् भने प्रतियोगिताको उत्कृष्ट गोलरक्षक, डिफेन्स, मिड फिल्डर, स्ट्राइकर, प्रशिक्षकले जनही नगद २५ हजार पुरस्कार पाउनेछन् । प्रतियोगिताको सर्वाधिक गोलकर्तालाई ३५ हजार पुरस्कार दिइनेछ ।

आइतवारको खेल बागमती युथ क्लब सर्लाही र एभेनियर एफसि क्यामरुनबीच खेल हुने आयोजक धरान फुतटबल क्लबले जनाएको छ । प्रतियोगिताको उद्घाटन धरानका मेयर हर्क साम्पाङ राईले गरेका थिए ।
कोरोनाका कारण विगत दुइवर्ष देखि वुढासुव्वा गोल्डकप हुन सकेको थियो ।