विष्णु मेमोरियलमा छात्राहरूलाई आत्मरक्षा तालिम प्रदान

छाल खवर
धरान,१४ असोजःविष्णु मेमोरियल माध्यमिक विद्यालय धरान–९ ले आफ्ना विद्यार्थीहरुलाई आत्मरक्षाको तालिम दिएको छ ।

समाजमा बाल बालिका माथि विभिन्न घटना हुन थालेपछि आत्मरक्षाको लागि सहज होस भन्ने उदेश्यले तालिम दिएको हो ।

विद्यार्थीहरूलाई आफूमाथि आइपर्ने शारीरिक आक्रमणको सामना गर्दै आत्मरक्षाका लागि अपनाउनु पर्ने सिप, कला प्रदान गर्न तालिमको आयोजना गरेको स्कुलले जनाएको छ ।

बालिकाहरू माथि हुने दुर्व्यवहार तथा बलात्कारका घट्नाको सामना गर्न छात्राहरूलाई सशक्तीकरण, आत्मबल प्रदान गर्न आत्मरक्षाको तालिम प्रदान गरिएको विद्यालयको भनाई रहेको छ ।

स्कुलले दिएको जानकारी अनुसार विद्यालयको शैक्षिक क्यालेण्डर बमोजिम शुक्रवार कक्षा ८ देखि १२ सम्म अध्ययनरत २५० भन्दा बढी छात्राहरूलाई आत्मरक्षाका तालिम दिइएको हो ।

तालिममा सहभागी छात्राहरूलाई आपतकालिन र अप्रत्याशित अवस्थामा आफ्नो जीउ ज्यानको सुरक्षा कसरी गर्ने भन्ने बारे व्यवहारिक रूपमा आवश्यक ज्ञान सीप प्रदान गरिएको थियो ।

आत्मरक्षा तालिम मार्फत छात्राहरूलाई मानसिक, बौद्धिक र शारीरिक रूपमा बलियो बन्न, आत्मविश्वास वृद्धि गरी पठनपाठनमा उत्साह बढाउन योगदान गर्ने प्रधानाध्यापक निलमकुमार श्रेष्ठको विश्वास रहेको छ ।

प्रिन्सिपल श्रेष्ठका अनुसार समाजमा बालिका विरुद्ध हुने अपराधका घटना बढ्दै गएकाले उनीहरूलाई सुरक्षित बनाउन सुरक्षाको प्रत्याभूति गराउन विद्यालयले आत्मरक्षा तालिम प्रदान गरीएको हो ।

आत्मरक्षा तालिमको बाह्य प्रमुख प्रशिक्षक सुबीक्षा राई, सहायक प्रशिक्षक विद्यालयका तेक्वान्दो र कराँते प्रशिक्षकहरू सुलभ श्रेष्ठ र सन्तोष राई रहेका थिए ।

विष्णु मेमोरीयल विद्यालयले विभिन्न समयमा विद्यार्थीहरुलाई पढाईका अतिरीक्त कृयाकलाप आयोजना गर्दै आएको छ ।