एन्फा प्रेसिडेन्ट कप अण्डर १५ फुटबल प्रतियोगिता धरानमा

छाल खवर
धरान,२५ मंसिरः कोशी प्रदेश स्तरीय एन्फा प्रेसिडेन्ट कप अण्डर १५ फुटबल प्रतियोगिता धरानमा पहिलो पटक आयोजना हुने भएको छ ।

कोशी प्रदेश फुटबल संघको आयोजनामा धरानमा सो प्रतियोगिता हुन लागेको हो ।

आयोजकले आइतवार पत्रकार सम्मेलनगरी दिएको जानकारी अनुसार मंसिर २७ गते देखि प्रतियोगिता शुरु हुने जानकारी दिर्एको छ ।

प्रतियोगितामा धरान फुटबल क्लब, राष्ट्रिय जागृति क्लब इटहरी, न्यु स्टार फुटबल क्लब वराहक्षेत्र, मोरङका उर्लाबारी नगरपालिका, मिल्स भेट्रान क्लब, विराट ट्रेनिङ सेन्टर, झापाका ध्रुवतारा स्पोर्टिङ क्लब, झापा नेशनल एकेडेमी र उदयपुरको गाईघाट फुटबल क्लब सहित १० टिमले सहभागिता जनाउने एन्फा कोशी प्रदेश अध्यक्ष किशोर राईले जानकारी दिएका छन।

प्रतियोगिता धरान १७ स्थित एन्फा खेलमैदानमा हुनेछ ।

आयोजकले दिएको जानकारी अनुसार प्रतियोगितामा विजेताले ५० हजार नगद र उपविजेताले २५ हजार नगदसहित ट्रफी, मेडल र प्रमाणपत्र प्राप्त गर्नेछन् ।

प्रतियोगितामा उत्कृष्ट खेलाडीले ५ हजार रुपैयाँ र व्यक्तिगत विधागततर्फ उत्कृष्ट खेलाडीले जनही २ हजार रुपैयाँ नगद प्राप्त गर्नेछन् ।

प्रत्येक दिनको खेलका म्यान अफ द म्याचले नगद १ हजार रुपैयाँ प्राप्त गर्नेछन् ।प्रतियोगिताको फाईनल खेल पुस ६ गते हुनेछ ।

अध्यक्ष राईले “अव पालो नविन युवा पिढीको,लक्ष्य तयारी हाम्रो वल्र्ड कप”को भन्ने मुल नाराका साथ प्रदेश स्तरीय अन्डर १५ प्रतियोगिताको बिशेष तयारी गरिएको बताए ।

वल्र्डकपको बिशेष तयारीका लागि १५ वर्ष बालबालिकालाई खेल्नु पर्दछ भनेर प्रतियोगिता आयोजना गरिएको बताए । उनले भने प्रदेश र जिल्लाले क्यालेन्डर बनाई कार्यतालिका अनुसार यस बर्षमात्र ४ वटा प्रतियोगिता गरिसकेको छ तर अन्य ५ वटा प्रदेश र जिल्लाहरुले केही प्रतियोगिता नगरेको बताए ।