थारु र मगर समुदायको पर्वमा कांग्रेसको शुभकामना आदान–प्रदान

छाल खवर
धरान,३ माघः नेपाली कांग्रेसले थारु समुदायको माघी पर्व र मगर समुदायको मिनाम सार ल्हेस पर्वको अवसरमा सांस्कृतिक कार्यक्रम तथा शुभकामना आदान–प्रदान सम्पन्न गरेको छ ।

नेपाली कांग्रेस, प्रतिनिधिसभा क्षेत्रीय कार्यसमिति, क्षेत्र नं. १, सुनसरीका सभापति सुजेन्द्र तामाङको अध्यक्षतामा धरानमा कार्यक्रम गरिएको हो ।

कांग्रेसको क्षेत्र नं. १, सुनसरीले दशैं, तिहार, छठ, नेपाल सम्वत् र तीजमा जस्तै विभिन्न आदिवासी जनजाति समुदाय र धर्मवलम्वीहरुको चाडपर्व र उत्सवहरुमा पनि शुभकामना आदान–प्रदान, र सांस्कृतिक कार्यक्रम लगायत विविध मनोरञ्जनात्मक गतिविधिहरु गरेर मनाउन थालेको छ ।

हरेक नेपाली समुदायको मौलिक एवम् परम्परागत चाड, पर्व, उत्सव, धर्म, संस्कार र संस्कृतिको जगेर्ना गर्ने मुख्य दायित्व राजनीतिक दलको पनि उत्तिकै भएकोले यसैका निम्ति विविध कार्यक्रम गरी सबैको चाडपर्व मनाइएको क्षेत्रीय सभाति सुजेन्द्र तामाङले बताए ।

कार्यक्रमका प्रमुख अतिथि नेपाली कांग्रेसका पूर्व केन्द्रीय सदस्य तथा पूर्व सांसद मीना सुब्बाले जातजाति, भाषाभाषी र धर्मवलम्वीहरुको विभिन्न चाडहरुलाई मनाउने कार्य शुरु गरेर क्षेत्रीय समितिले प्रशंसनीय कार्य गरेको बताईन ।

विशिष्ट अतिथि नेपाली कांग्रेसका जिल्ला सभापति एवम् ईनरुवा नगर प्रमुख केदार भण्डारीले कांग्रेसको १ नं. क्षेत्रीय कार्यसमितिले महामानव वी.पी. कोइरालाले भने बमोजिम जनता र समुदायको मन छुने कार्य गरेको बताए ।

विशेष अतिथि नेपाली कांग्रेसका पूर्व जिल्ला सभापति तथा पूर्व सांसद हरिनाथ वास्तोलाले कांग्रेसले पहिलोपल्ट फरक शैलीमा समुदायको पहिचानमा टेवा पुग्ने गरी कार्यक्रम भएको बताए ।

विशेष अतिथि पूर्व प्रदेश प्रमुख डा. गोविन्द सुब्बाले कार्यक्रमले जातिय संस्कृतिलाई संरक्षण र प्रवद्र्धन हुने भन्द्र यसको निरन्तरता हुनुपर्नेमा जोड दिए ।

नेपाल मगर संघ, धरानका अध्यक्ष चित्र राज थापा मगरले राजनीतिक पार्टीको तर्फवाट पहिलो पल्ट हाम्रो समुदायलाई निम्तो गरेर हाम्रो चाड मिनाम सार ल्हेस (नयां वर्ष) मनाएको भन्दै खुशी व्यक्त गरे ।

थारुकल्याणकारीणी सभा सुनसरीका उपाध्यक्ष जानकी चौधरी र नेत्री सरिता चौधरीले थारु समुदायको महान पर्व माघीलाई राजनीतिक दलस्तरवाट नेपाली कांग्रेसले पहिलो पल्ट मनाएर थारु समुदायको आत्मसम्मानलाई बढाएको बताईन ।

कार्यक्रममा थारु र मगर समुदायको विविध सांस्कृतिक नृत्य र झांकी प्रस्तुत गरिनुका साथै जातीय खाद्य परिकार समेत खुवाइएको थियो ।

कार्यक्रममा जिल्ला सचिव माधव घिसिङ, प्रदेश सांसद ममता तामाङ, प्रदेशसभा १(१) सभापति अनिल श्रेष्ठ, महासमिति सदस्य श्यामा रेग्मी, नगर सभापति श्याम पोखरेल, जिल्ला सदस्य रत्न रिमाल लगायतको उपस्थिति रहेको थियो ।
कार्यक्रमको सञ्चालन क्षेत्रीय सचिव महेन्द्र प्रधानले गरेका थिए ।