धरानमा राष्ट्रिय ब्याडमिन्टन प्रतियोगिता

छाल खवर
धरान,१०असोजः खेलकुदको शहर उपनामले चिनिने धरानमा पहिलो पटक राष्ट्रिय खुल्ला ब्याडमिन्टन प्रतियोगिता हुने भएको छ ।

धरान ब्याडमिन्टन क्लबको आयोजनामा धरानमा पहिलो पटक सो प्रतियोगिता आयोजना हुन लागेको हो ।

क्लवले बिहीबार पत्रकार सम्मेलन आयोजना गरी क्लबको आयोजनामा असोज १७ गते देखि राष्ट्रिय प्रतियोगिता आयोजना हुने जानकारी गराएको हो ।

प्रतियोगीता धरान–१३ स्थित अमर सेवा समाजको कभर्डहलमा सञ्चालन हुने क्लवका अध्यक्ष तथा संयोजक टंक बहादुर लिम्बुले जानकारी दिएकाछन् । प्रतियोगिता ३ दिन चल्नेछ ।

सो ‘प्रतियोगितामा नेपालको ७७ वटै जिल्लाका २ सय टिमका ४ सय खेलाडी सहभागी हुनेछन् ।

प्रतियोगितामा सुरक्षा निकायका ३ विभागीय टिम पनि सहभागी हुने आयोजकले जनाएको छ ।

धरानको खेल पर्यटन प्रवर्द्धन गर्ने उद्देश्यले प्रतियोगिता आयोजना गरिएको क्लवका सदस्य खगेन्द्र मेन्याङ्वोले बताए ।

खेलकुद ‘प्रतियोगीताहरु आयोजना हुन नसक्दा युवा प्रतिभाहरू पलायन भई समक्ष खेलाडी उत्पादनमा कमी आएको मेन्याङ्वोको भनाई रहेको छ ।

प्रतियोगितामा ब्याडमिन्टन खेलको इतिहासकै उत्कृष्ट पुरस्कार राशि राखिएको दाबी आयोजकले गरेको छ ।

संयोजक लिम्बुका अनुसार खुल्ला पुरुष डबलतर्फका विजेता जोडीलाई १ लाख १५ हजार नगद पुरस्कार प्रदान गरिने छ भने प्रतियोगिताको उपबिजेताले ५५ हजार नगद, तेस्रो पुरस्कार ३० हजार सहित मेडल र प्रमाणपत्र रहने छ ।

खुल्ला भेट्रान्स ४५ प्लस, सुपर भेट्रान्स ५५ प्लस र लेडिज डबल्स, मिक्स डबलका विजेताले ६५ हजार, उपबिजेताले ३३ हजार र तेस्रो हुनेले ११र११हजार सहित मेडल र प्रमाणपत्र पाउने छन् ।

प्रतियोगितामा राष्ट्रिय रेफ्री तथा कोच केदार धिमाल प्रमुख निर्णायक रहने बताइएको छ ।

टिम दर्ता शुल्क खुल्ला मेन्स डबल, भेट्रान ४५ प्लस, सुपर भेट्रान ५५ प्लसका प्रतियोगीका लागि ३ हजार रुपैयाँ, मिक्स डबल २५ सय र खुल्ला लेडिज डबलका प्रतियोगीका लागि २ हजार रुपैयाँ निर्धारण गरिएको धरान ब्याडमिन्टन सङ्घले जनाएको छ ।

प्रतियोगिता असोज १७ देखी १९ गते सम्म सञ्चालन हुनेछ ।क्लव कानुनी दर्ता भएको महिना मै यो प्रतियोगिता आयोजना गरेको हो ।