धरानमा खुल्ला राष्ट्रिय ब्याडमिन्टन प्रतियोगिता सुरु

छाल खवर
धरान,१८असोजः खेलकुदको उपनामले परिचित धरानमा प्रथम राष्ट्रिय खुल्ला ब्याडमिन्टन प्रतियोगिता शुक्रवारदेखि सुरु भएको छ ।

प्रतियोगिता धरान–१३ स्थित अमर सेवा समाजको कभर्डहलमा तीन दिनसम्म सञ्चालन हुनेछ ।

धरान ब्याडमिन्टन क्लबको आयोजनामा राष्ट्रिय प्रतियोगिता भएको हो ।

प्रतियोगिताको उद्घाटन कोशी प्रदेशका पूर्व मुख्यमन्त्री राजेन्द्र राईले उद्घाटन गरेका थिए ।

पूर्व मुख्यमन्त्री राईले खेलकुद क्षेत्रको विकासमा प्रदेश सरकारले पर्याप्त रकम छुटाउन नसकेपछि धरान ब्याडमिन्टन क्लबले स्थानीय साधन श्रोत जुटाएर राष्ट्रिय प्रतियोगिता आयोजना गर्नु प्रशंसनीय कार्य भएको बताए ।

प्रतियोगितामा नेपालको ७७ जिल्लाका १२४ टिमबाट ५०० जना खेलाडी सहभागी भएको संयोजक टङ्क लिम्बुले बताए ।प्रतियोगितामा सुरक्षा निकायका ३ विभागीय टिम पनि सहभागिता रहेको छ ।

प्रतियोगितामा खुल्ला मेन्स डबल २९ टिम , खल्ला महिला डबल ९ टिम , मिक्स डबल ३० टिम, भेट्रान डबल ४५ प्लसका ३३ टिम , भेट्रान डबल ५५ प्लस २४ टिम बिच प्रतिस्पर्धा हुनेछ ।

प्रतियोगिताको विजेताहरूले खुल्ला पुरुष डबलका विजेता जोडीलाई १ लाख १५ हजार, उपबिजेताले ५५ हजार, तेस्रो पुरस्कार ३० हजार सहित मेडल र प्रमाणपत्र पाउने छ ।

खुल्ला भेट्रान्स ४५ प्लस, सुपर भेट्रान्स ५५ प्लस र लेडिज डबल्स मिक्स डबलका विजेताले ६५ हजार, उपबिजेताले ३३ हजार र तेस्रो हुनेले ११र११हजार सहित मेडल र प्रमाणपत्र पाउने छन् ।

प्रतियोगितामा राष्ट्रिय रेफ्री तथा कोच केदार धिमाल प्रमुख निर्णायक रहेका छन् । उद्घाटन कार्यक्रमको सभापतित्व अध्यक्ष टङ्क लिम्बुले गरेका थिए ।