प्रतिशोध लिन गौर हत्याकाण्ड विउत्याउन खोजेको जसपाको आरोप

छाल खवर
धरान,५ भाद्रः जनता समाजवादी पार्टी नेपाल धरान नगर समितिले सरकारसँग भूमि सम्बन्धी विधेयक फिर्ता लिन माग गर्दै धरानमा विरोध प्रदर्शन गरेको छ ।

सरकारले ल्याउन लागेको भूमि सम्वन्धि विधेयक जनतामारा भएको भन्दै जसपाले फिर्ता लिन माग गर्दैं विरोध गरेको हो ।

भानुचोकमा प्लेकार्ड सहित धर्ना बसी कोणसभा गरेर विरोध प्रदर्शन गरिएको हो । विरोध प्रदर्शनीमा प्लेकार्डमा केपी ओली राजीनामा दे, पहिचान विरोधी होसियार, जनतामारा भूमि विधेयक फिर्ता गर, पहिचान विरोधी ओली मुर्दावाद, प्रतिरोधात्मक राजनीति बन्द गर, नश्लिय सरकार मुर्दावाद लगायतका नारा लेखिएका थिए ।

जसपा नेपालका केन्द्रीय सदस्य तथा धरान नगर अध्यक्ष ताजुव लिम्बुले सरकारले विधेयक फिर्ता लिनुपर्ने नसके संशोधन गरि सम्बोधन गरिनुपर्ने बताए ।

उनले वास्तविक सुकुम्वासी, भूमिहीनहरूले जग्गा पाउन्,भू माफिया र दलालहरूलाई पोस्ने ढोका बन्द गर्न आग्रह गरे ।

उनले केपी ओली सरकारले जसपा अध्यक्ष उपेन्द्र यादवले सरकारलाई समर्थन नदिएकोले कारण उनीसँग प्रतिशोध साँध्न राजनैतिक मुद्दा उचालेको आरोप लगाए ।

ओली सरकारले राजनैतिक प्रतिशोध लिन सुनियोजित रूपमा गौर हत्याकाण्ड विउत्याउन खोजेको बताए ।