धरान रन ७०० औं हप्ता सम्पन्न

छाल खवर
धरान,४ असोजः धरानमा जारी धरान रनले सफलता पूर्वक ७ सय हप्ता पुरा गरेको छ ।

धरान रन समुहको आयोजनामा सन् २०११ देखि शुरुवात भएको धरान रनले शनिवार ७सय औं औं हप्ता पुरा गरेको हो ।

रोग लागेर उपचार गर्नुभन्दा रोग लाग्नै नदिनु उत्तम उपाय हो भन्ने आह्वान गर्दै शुरु भएको धरान रनले ७०० औं हप्ता पुरा गरेको धरानका अध्यक्ष हेमन सुनुवारले जानकारी दिए ।

स्थापनाको समयदेखि नै धरान रन प्रत्येक शनिबार बिहान ७ बजे यलम्बर पार्कबाट शुरुवात हुने गर्छ ।

सानो संख्याबाट शुरु गरेको धरान रन प्रत्येक वर्ष हजारौको धावकको संख्यामा नेवा च्यारिटी १० के धरान रन प्रतियोगितासम्म आयोजना गर्न सफल हुदै आएको छ ।

सो रनमा नेपालकै सर्वाधिक धावक धाविका सहभागी हुने दौडको रुपमा रहेको आयोजकको दावी रहेको छ ।

प्रतियोगिताबाट बचत भएको रकमले विपन्न विद्यार्थीहरुलाई छात्रवृत्ति प्रदान गरिदैआएको र विगतमा विभिन्न असहाय व्यक्ति तथा संस्थाहरुलाई आर्थिक सहयोग पनि गर्दैै आएको धरान रनका अध्यक्ष सुनुुवारले वताए ।

हाल युकेमा रहेका धरान रनका संस्थापक सन्तोष राईले युकेको पार्क रनको अवधारणामा धरान रन शुरुवात गरेका थिए ।

केही वर्षयता देखि धरान रनबाट प्रेरीत भएर तरहरा रन, केरावारी रन,ताप्लेजुङ, भोजपुर रन लगायत दौड प्रतियोगिताहरु संचालन हुन शुरु भएकाछन् ।

कार्यक्रमका प्रमुख अतिथि नेपाल पत्रकार महासंघ सुनसरीका अध्यक्ष सन्तोष काफ्लेले धरान रनले धरानलाई खेलकुदको सहर, स्वास्थ्यप्रति सचेत सहरकोरुपमा स्थापित गर्न सफल भएको धारणा व्यक्त गरेका थिए ।

धरान रनका अध्यक्ष हेमन सुनुवारका अनुसार ७०० औं हप्ता गत साता नै पुरा भएपनि जेनजी आन्दोलनको कारण उक्त हप्ता रन स्थगित गरिएको थियो ।