देउसीको रकम जेन जि आन्दोलनबाट ध्वस्त भौतिक पूर्वाधार निर्माण कोषमा

छाल खवर
धरान,१९ कार्तिकः देउसी खेलेर संकलन भएको रकमले तपाई के गर्नुहुन्छ ? वरावर वाडने,वनभोज खाने या रमाइलो गर्ने, वा अन्य काम गर्ने धेरैको यही उत्तर हुन्छ तर त्यो भन्दा फरक काम गरेर देखाएको छ धरान–१७ स्थित सचेत नागरिक समूह धरान–१७ ले ।

तिहारमा एक दिने देउसी खेलेर सङ्कलन भएको २ लाख १ हजार १ सय रुपैया समूहले जेन–जी आन्दोलनमा तोडफोड,आगजनी गर्दा क्षतिग्रस्त भएका भौतिक संरचनाहरूको पुनर्निर्माण कोषमा जम्मा गरेको छ ।

समूहले वुधवार इलाका प्रशासन कार्यालयमा पत्रकार सम्मेलन गरी भौतिक पूर्वाधार पुर्ननिर्माण कोषको खातामा रकम जम्मा गरेको जानकारी गराएको छ ।

समूहले सो रकम राष्ट्रिय वाणिज्य बैङ्कमा खोलिएको भौतिक पूर्वाधार पुनर्निर्माण कोषको खाता नम्बर १९६०१००१०२०७०००४० मा मङ्गलवार जम्मा गरेको थियो ।

समूहले रकमको डिपोजिट भौचर बुधवार इलाका प्रशासन कार्यालय धरानका प्रमुख लक्ष्मीप्रसाद रेग्मीलाई धरान–१७ का वडाध्यक्ष सूर्यबहादुर भट्टराईले हस्तान्तरण गरेका थिए।

पुनर्निर्माणका लागि कात्तिक ५ गते रेल्वे चोकमा वडा कार्यालयको सहकार्यमा देउसी आयोजना गरिएको थियो ।कार्यक्रमका संयोजक दयाराम थापाले सांस्कृतिक परम्परा जोगाउँदै सामाजिक उत्तरदायित्वमा हातेमालो गर्ने उद्देश्यले देउसी कार्यक्रम आयोजना गरिएको बताए।

वडाध्यक्ष भट्टराईले रकम के कति भन्दापनि राज्यलाई गारो सारो र समस्या पर्दा हरेक नागरिकले केही न केही गर्न सकियोस भन्ने उदेश्यले सहयोगको शुरुवात गरीएको वताउनु भयो ।

समूहका सदस्य रमेश खड्काले देश दुखेको वेला केही सहयोग गर्न सकियोस भनेर सहयोग गरीएको र आगामी दिनहरुमा पनि सहयोग गर्दै जाने वताउनु भयो ।

इलाका प्रशासन कार्यालयका प्रमुख रेग्मीले राज्यप्रतिको दायित्व वहन गरेकोमा धन्यवाद दिनु भएको थियो । उहाले तत्काल सो कुराको जानकारी केन्द्रमा गराउने वताउनु भयो ।

समूहले गत वर्ष २०८१ सालको भीषण बाढीका पीडितका लागि देउसी कार्यक्रमबाट सङ्कलित २ लाख ५ हजार रुपैयाँ सरकारी राहत कोषमा बुझाएको थियो ।

त्यस अघि कोरोना महामारीको समयमा समूहले खाद्यान्न वितरण, लत्ताकपडा सहयोग, होल्डिङ सेन्टर, क्वारेन्टाइन व्यवस्थापनमा सक्रिय भूमिका खेलेको थियो ।