होली गार्डेन एकेडेमीले ५ जना विद्यार्थीलाई ३ वर्ष आमा बुवा स्मृति छात्रवृत्ति दिने

छाल खवर
धरान,२० चैत्र ः होली गार्डेन एकेडेमी धरान–१ ले आफ्नो विद्यालयभन्दा बाहिरबाट आउने ५ जना विद्यार्थीलाई विशेष छात्रवृत्ति प्रदान गर्ने भएको छ ।

विद्यालयले शैक्षिक सत्र २०८३ का लागि कक्षा ८ मा भर्ना हुन चाहने उत्कृष्ट विद्यार्थीहरूका लागि आमा बुवा स्मृति छात्रवृत्ति प्रदान गर्ने भएको हो ।

सामाजिक उत्तरदायित्व र जेहेन्दार विद्यार्थीहरूलाई प्रोत्साहन गर्ने उद्देश्यले विशेष छात्रवृत्ति कार्यक्रमको घोषणा गरीएको एकेडेमीका प्रिन्सिपल राजेन्द्र गुरुङले वताए ।

आफ्नो विद्यालय भन्दा वाहिरबाट आएका विद्यार्थीहरु मध्येबाट उत्कृष्ट नतिजा ल्याउने ५ जना विद्यार्थीहरूले कक्षा ८ देखि १० कक्षासम्म ३ वर्षका लागि शतप्रतिशत छात्रवृत्ति प्राप्त गर्ने छन् ।

आर्थिक अवस्था कमजोर भएका तर पढाइमा अब्बल विद्यार्थीहरूलाई गुणस्तरीय शिक्षाको अवसर प्रदान गर्न यो छात्रवृत्ति कोशेढुङ्गा सावित हुने विद्यालयका प्रिन्सिपल राजेन्द्र गुरुङको दावी रहेको छ ।

प्रिन्सिपल गुरुङका अनुसार विद्यार्थीले कक्षा ७ को वार्षिक वा अन्तिम परीक्षामा कम्तीमा ८० प्रतिशत अंक वा ३ दशमलव ८ जिपिए हासिल गरेको हुनुपर्नेछ ।

हाल आफ्नो परीक्षाको नतिजा पर्खिरहेका विद्यार्थीहरूले विद्यालयको प्रवेश परीक्षामा सहभागी हुन सक्नेछन्, तर भर्ना प्रक्रियाको समयमा अनिवार्य रूपमा आधिकारिक ग्रेडसिट पेश गर्नुपर्नेछ ।

छनौट प्रक्रिया पहिलो चरण यही चैत्र २६ गते र दोश्रो चरण बैशाख २ गते हुने जानकारी गरिएको छ ।

विद्यालय सञ्चालकहरुको वुवा आमाको नाममा आमा बुबा स्मृति छात्रवृत्ति कार्यक्रम शुरु गर्न लागेको हो ।

धरानको शिक्षा क्षेत्रमा राम्रो पहल हो, जसले आर्थिक रूपमा कमजोर तर प्रतिभाशाली विद्यार्थीहरूलाई गुणस्तरीय शिक्षामा पहुँच दिलाउँदै उनीहरूको भविष्य निर्माणमा महत्वपूर्ण भूमिका खेल्ने विश्वास गरिएको छ ।