खोपकेन्द्रमा राजनीतिक दलबाट पनि प्रतिनिधि पठाउने निर्णय

छाल खवर
धरान,१६ साउन ः कोरोना विरुद्धको खोपमा दुरुपयोग भएको भन्ने व्यापक विरोध भएपछि धरानमा खोप कार्यक्रमलाई व्यवस्थित गरीने भएको छ ।

नगरप्रमुख तिलक राईको अध्यक्षतामा शुक्रबार धरान उपमहानगरपालिकामा बसेको सर्वदलिय बैठकले यस्तो निर्णय गरेको हो ।

धरानमा अब केहीदिन भित्रमा अमेरिकन जोनसन एण्ड जोनसन खोप आउँदै छ ।

धरानमा गएको सोमबार, मंगलबार र बुधबार तीन दिन चाईनिज भेरोसेल खोपको पहिलो मात्रा लगाइएको थियो ।

यो खोप ५५ बर्ष उमेर भन्दा माथि र विभिन्न लक्षित समुहलाई लगाइएको थियो । तीन दिनमा धरानमा ११ हजार बढीले खोपको पहिलो मात्रा लगाएका थिए ।

बैठकमा तिन दिनसम्म सञ्चालन गरिएको खोप अभियानमा थुप्रै कमिकमजोरीहरु भएको विषयमा समिक्षा समेत गरिएको थियो ।

सर्वदलिय बैठकले आगामी खोप कार्यक्रमलाई सरल र सहज बनाउने निर्णय गरेको छ । ७ वटै खोप केन्द्रहरुमा राजनीतिक दलहरुबाट समेत अनुगमनका लागि १÷१ जना प्रतिनिधि पठाउने, ७ वटै खोप केन्द्रहरुमा सम्बन्धित वडाको १÷१ जना जनप्रतिनिधि रहने समेत व्यवस्था गर्ने निर्णय गरेको छ ।

खोप केन्द्रहरुमा लक्षित समुहका वडावाईज अलग÷अलग लाईन लगाएर खोप लगाईने व्यवस्था गर्ने निर्णय गरेको छ ।

यस्तै, खोपलाई व्यवस्थित गर्न २० वटै वडाका वडाध्यक्षहरुकोे अध्यक्षतामा राजनितिक दलको प्रतिनिधिसहितको संयन्त्र (समिति) बनाई लक्षित समुहको तथ्यांक संकलन, खोप केन्द्र व्यवस्थापन गर्न समेत निर्णय भएको छ । साथै, नगरपालिकालाई सुझाव दिने गरि वडा समितिलाई अनुरोध गर्ने पनि निर्णय गरेको छ ।

बैठकमा नेकपा एमाले, नेपाली कांग्रेस, नेकपा माओवादी, जनता समाजवादी, राष्ट्रिय जनमुक्ति, संघिय लिम्बुवान, नेकपा माले, राप्रपा नेपालका नेताहरुको उपस्थिति रहेको थियो ।