प्रतिष्ठानको तत्काल नेतृत्व गर्न प्रमुख विशेषज्ञ डा श्यामसुन्दर यादवको नेतृत्वमा पाँच सदस्यीय टोली आज धरान आउदै वीपी प्रतिष्ठानका पदाधिकारीहरु निलम्वनमा

काठमाडौँ, ३ माघ ः धरान स्थित वीपी कोइराला स्वास्थ्य विज्ञान प्रतिष्ठानका पदाधिकारीहरुलाई स्वास्थ्य मन्त्रालयले निलम्वन गरेको छ ।

मन्त्रालयले प्रतिष्ठानको दैनिक कामकाज गर्न स्वास्थ्य मन्त्रालयबाट प्रमुख विशेषज्ञ डा श्याम सुन्दर यादवको नेतृत्वमा पाँच सदस्यीय टोली पठाउने निर्णय गरेको छ ।

मन्त्रालयले सिफारीस गरेको टोली मंगलवार नै प्रतिष्ठान आइपुग्ने र कार्यभार सम्हाल्ने स्रोतले जनाएको छ ।

मन्त्रालयले बर्तमान उपकुलपति र अन्य पदाधिकारीहरु छानवीनको दायरामा परेपछि शैक्षिक तथा प्रशासनिक क्रियाकलाप अघि बढाउन अफ्टेरो परेको भन्दै डा यादवको नेतृत्वमा टोली पठाउने निर्णय गरेको हो ।

मन्त्रालयले निर्णय गरेको फाइल कुलपति समेत रहेका प्रधानमन्त्री शेरबहादुर देउवाले सदर गरिदिएपछि कार्यान्वयनमा आएको हो ।

प्रधानमन्त्रीले फायल सदर गरेपछि नयाँ टिम काम गर्न अघि बढेको स्वास्थ्य मन्त्रीका विज्ञ सल्लाहकार डा रमेश ढकालले जानकारी दिएकाछन् ।

मन्त्रालय स्रोतले दिएको जानकारी अनुसार उपकुलपतिको जिम्मेवारी डा. यादवले सम्हाल्नेछन् भने शिक्षाध्यक्षको जिम्मेवारी वीर अस्पतालका एघारौँ तहका डाक्टर रविराम श्रेष्ठले चलाउने छन् । प्रशासन हेर्न मन्त्रालयले सुरेश दाहाललाई पठाउने निर्णय गरेको छ ।

मन्त्रालयका अनुसार दुई जना अन्य सदस्यमा कानून मन्त्रालयले कानून अधिकृत र अर्थ मन्त्रालयले एक जना लेखा हेर्ने अधिकृत पठाउने व्यवस्था मिलाइएको छ ।

प्रतिष्ठानमा आर्थिक अनियमितता, भ्रष्टाचार र बेथिति बढेको भन्दै ६ महिनाअघि प्रतिष्ठान शुद्धीकरण अभियान संयुक्त सङ्घर्ष समितिले पदाधिकारीविरुद्ध चर्को आन्दोलन गरेपछि सरकारले विभिन्न छानबिन समिति गठन गरेर प्रतिवेदन तयार गरेको थियो । करिब आधा दर्जन जति प्रतिवेदनहरूले पदाधिकारीको कमजोरीले प्रतिष्ठानमा भ्रष्टाचार मौलाएको र दिनदिनै धरासायी बनेको निष्कर्ष निकालेको थियो ।
चिकित्सक, नर्स, कर्मचारी र विद्यार्थीको पनि संयुक्त आन्दोलन चर्किंदै गएपछि चारै पदाधिकारीको कार्यकक्षमा तालाबन्दी गरिएको थियो । राजनीतिक नियुक्ति लिएर आएका पदाधिकारीलाई हटाउनु पर्ने र चिकित्सा शिक्षा ऐनअनुसार योग्य र दक्षलाई पदाधिकारी बनाउनुपर्ने माग बढ्दै गएपछि सरकारले चारै पदाधिकारीलाई कारबाही गर्ने प्रक्रिया चलाए पनि राजनीतिक अस्थिरताले ठोस रूप लिन नसकेपछि प्रतिष्ठान मियोविहीन भएको बेला सरकारले डा.यादवलाई पठाएको हो ।

प्रतिष्ठानका उपकुलपति डा. ज्ञानेन्द्र गिरीसहितको टीमले अनियमितता गरेको भन्दै त्यहाँका चिकित्सक, स्वास्थ्यकर्मी तथा कर्मचारीहरु लामो समय देखि आन्दोलन गर्दैै आएको छ ।

त्यहाँको अनियमितता छानवीन गर्नका लागि स्वास्थ्यमन्त्री खतिवडाकै संयोजकत्वमा छानवीन टोली गठन गरिएको थियो । सो टोलीले कुलपति एवं प्रधानमन्त्री शेरबहादुर देउवालाई प्रतिवेदन बुझाईसकेको छ ।

टोलीले अर्को व्यवस्था नभएसम्मका लागि प्रतिष्ठानको दैनिक कामकाज गर्ने गरी अधिकार दिइएको छ । यद्यपी यादव उपकुलपति भने होइनन् ।

स्थानीय स्तरबाट पनि पदाधिकारी परिवर्तनको लागि चर्को दवाव पर्दै आएको छ ।