आजदेखि गोधुली फुटबल रनिङ कप शुरू , उद्घाटन खेलमा धरान १३ र धरान ५ हुने

छाल खवर
धरान,३० पुष । हरेक वर्ष धरानमा हुँदै आएको अन्तर वडा स्तरीय गोधुलि फुटबल रनिङ कप आजदेखि सुरु हुने भएको छ ।

आजदेखि सुरु हुने २३ औं गोधुली फुटबल रनिङ कप प्रतियोगितामा धरानका २० वटै वडाले प्रतिष्पर्धा गर्ने भएका छन् ।

प्रतियोगिताको उद्घाटन १७ नं. वडाका वडाध्यक्ष मनोज भट्टराईको प्रमुख अतिथिमा साढे २ बजे देखि १७ औं संस्करणको विजेता वडा नं. १३ र वडा नं. ५ बिच हुने छ ।

धरान–१७ को गोधुली क्लबले २०५० सालदेखि सुरु गरेको वडास्तरीय गोधुली कपको विजेताले यसवर्ष नगद रु १ लाख ५० हजार र उपविजेताले नगद रु ७५ हजार पुरस्कार प्राप्त गर्ने आयोजक गोधुली क्लबले हिजो पत्रकार सम्मेलन गरेर जानकारी दिएको छ । साथै प्रतियोगिताको विजेता तथा उपविजेता टोलीलाई धरान वडा नं. १८ का वडाध्यक्ष प्रविण राईले रु २५÷२५ हजार थप पुरस्कार दिने घोषणा गर्नुभएको छ ।

प्रतियोगिता आज पुष २९ गते शनिबारदेखि धरान १६ स्थित रंगशालामा शुरुभइ माघ १४ गते फाइनल खेल हुने गोधुली क्लबले तालिका समेत सार्वजनिक गरेको छ ।

प्रतियोगिताको सम्पुर्ण तयारी पुरा भइसकेको पत्रकार सम्मेलनमा जानकारी दिइएको छ । फुटबल खेलको विकासमा टेवा पुर्याउनु साथै नव प्रतिभाशाली फुटबल खेलाडीहरुलाई अवसर प्रदान गर्न , युवा वर्गलाई कुलत र सामाजिक विकृतिको निर्मुल गर्न खेलको माध्यमले लागु पदार्थ मुक्त समाज निर्माणमा टेवा पुर्‍याउने उद्देश्यले आयोजना गरीएको उक्त प्रतियोगिताको यो २३ औँ संस्करण हो ।

धरानका २० वटै वडाले प्रतियोगितामा सहभागिता भएको समेत आयोजकले बताएको छ । प्रतियोगिता सम्पन्न गर्न धरान उपमहानगरपालिकाले निरन्तर संयोजन गरेको छ भने टुबोर्ग पनि प्रायोजनको रुपमा रहेको क्लबका उपाध्यक्ष सतिस केसीले जानकारी दिनुभएको छ ।

खेलमा दर्शकहरुलाई राउन्ड १६ सम्म ३० रुपैया सेमिफाइनलमा ५० रुपैया र फाईनल खेलमा १०० रुपैया लाग्ने आयोजकले बताएको छ ।