शारदा बालिका नमुना माविले ७५ पुरा गरेकोमा हीरक महोत्सव

छाल खवर
धरान,१० जेठः धरान–१६ स्थित शारदा बालिका नमुना माध्यमिक विद्यालयले आफ्नो स्थापनाको ७५औँ वर्ष पुरा गरेको अवसरमा हीरक महोत्सव मनाउने भएको छ ।

विद्यालयले वुधवार पत्रकार सम्मेलनको आयोजना गरी सो विषयमा जानकारी गराएको हो ।

हिरक महोत्सव समितिका संयोजक विद्यालयका शिक्षक पदम लुइटेलले हीरक महोत्सव जेठ २४ देखी ३१ गतेसम्म विभिन्न कार्यक्रम आयोजना गरी मनाइने जानकारी दिए ।

उनका अनुसार महोत्सवमा विद्यार्थी तहमा स्वास्थ्य, साहित्य र खेलकुदका कार्यक्रमहरू राखिएका छन् । अभिभावकहरूमा क्यान्सर सचेतना, पाठेघरको मुख क्यान्सर परीक्षण, अभिभावक शिक्षा कार्यक्रम आयोजना गरिने छ ।

त्यसैगरी आँखा परीक्षण, रक्तदान, हाडजोर्नी परीक्षणका शिविरहरू महोत्सव भर सञ्चालन गरिने छ ।

नगर स्तरीय छात्रा भलिबल प्रतियोगिता, कविता प्रतियोगिता, नगर स्तरीय हाजिरी जवाफ प्रतियोगिता सहित महोत्सव समापन गरिने छ ।

पत्रकार सम्मेलनमा विद्यालय व्यवस्थापन समिति अध्यक्ष दिभा श्रेष्ठ महोत्सव सफल वनाउनका लागि सवैले आ–आफ्नो ठाउबाट सहयोग गरीदिन आग्रह समेत गरेकी थिइन ।

उनले आफू व्यवस्थापन समितिमा आएपछि स्कुललाई नयाँ गति दिने योजना अघि बढाएको बताइन् ।

पछिल्लो समय अङ्ग्रेजी माध्यमका निजी विद्यालयहरू सँग प्रतिस्पर्धा, अभिभावकहरूको सोचाइमा आएको परिवर्तनका कारण छात्राहरू मात्र पढाई हुने विद्यालयले समस्याको सामना गर्नु परेको उनको भनाई थियो ।

अध्यक्ष श्रेष्ठका अनुसार विद्यालयमा आकर्षण बढाउन प्राविधिक विषयको पठनपाठन थप गर्ने योजनामा काम भइरहेको छ । उनले भनिन् ‘छात्राहरूको स्कुल भएकोले फेसन डिजाइन तथा ब्युटी पार्लरको प्राविधिक विषय उपयुक्त हुने हामीले ठहर गरेका छौँ ।’ विद्यालयमा हाल प्लस टूमा शिक्षा र व्यवस्थापन विषयको पठन पाठन भइरहेको छ ।

हाल विद्यालयमा ५ सय छात्राहरु अध्ययनरत छन् । विद्यालय परिसरमा २५ जना छात्रा बस्ने छात्रावास छ । फुटबल ग्राउण्ड, बास्केटबल कोर्ट र परिसर भित्रै क्यान्टिन पनि सञ्चालनमा छ ।

विद्यालयमा ४४ जना छात्रवृत्ति दाताहरूबाट ३२ लाख छात्रवृत्ति कोषमा स्थापना गरिएको छ । उक्त कोषबाट वार्षिक दुई दर्जन गरिब, जेहेन्दार विद्यार्थीहरूलाई छात्रवृत्ति प्रदान गरिँदै आएको छ ।

प्रधानाध्यापक धर्मनारायण सिंहले विद्यालयको पुरानो साख फर्काउन हीरक महोत्सवले योगदान पुर्‍याउने विश्वास व्यक्त गरेकाछन् ।

महोत्सवमा विद्यालयका पूर्व विद्यार्थी, शिक्षक तथा स्थापनाकालमा योगदान गरेका दाताहरूलाई सम्मान गरिने कार्यक्रम छ ।

हीरक महोत्सवका लागि विद्यालयले व्यवस्थापन समितिकी अध्यक्ष दिभा श्रेष्ठको अध्यक्षतामा सङ्घीय सांसद, प्रदेश सांसद, विद्यालयका पूर्व प्रधानाध्यापक, शिक्षक, व्यवसायी, समाजसेवी सहितको १०१ जनाको मूल समारोह समितिसमेत गठन गरेको छ ।