विपी प्रतिष्ठानको उपकुलपतिमा धरानका विक्रम श्रेष्ठ

छाल खवर
धरान,२८ साउनः केही महिना अघिदेखि रिक्त भएको विपी कोइराला स्वास्थ्य विज्ञान प्रतिष्ठान धरानको उपकुलपतिमा धरानका हाडजोर्नी विशेषज्ञ प्राध्यापक डाक्टर विक्रम प्रसाद श्रेष्ठ नियुक्त भएका छन्।

प्रधानमन्त्री तथा प्रतिष्ठानका कुलपति केपी शर्मा ओलीले मंगलबार उनलाई नियुक्त गरेका हुन्।

सर्च कमिटीले यसपटक परम्परागत तीनको सट्टा चार जनाको नाम सिफारिश गरेको थियो। अन्तर्वार्ता र प्रस्तुतीकरणपछि प्रा.डा. प्रह्लाद कार्की, प्रा.डा. रामेश कोइराला र प्रा.डा.रोहित यादवको नाम तय भए पनि, चर्को दबाब र लविङका कारण प्रा.डा.श्रेष्ठको नाम पनि अन्तिम सूचीमा समावेश भएको हो।

धरानमा लामो समयदेखि स्थानीय व्यक्तिलाई उपकुलपतिमा नियुक्त गर्नुपर्ने माग उठ्दै आएको थियो।

विगतमा प्रतिष्ठानको शिक्षाध्यक्षका रूपमा एक कार्यकाल पूरा गरेका श्रेष्ठलाई नियुक्त गराउन प्रतिष्ठानकै कर्मचारी र चिकित्सकहरू सक्रिय भएका थिए।

शिक्षाध्यक्ष हुदा राम्रो प्रभाव छोडेका श्रेष्ठ प्रतिष्ठानका निस्कलंक र अनुभवी डाक्टरका रुपमा परिचित रहेकाछन् । लामो समयदेखि स्थानीयको नेतृत्व माग भइरहेको अवस्थामा डा श्रेष्ठ पहिलो पटक उपकुलपति वन्न सफल भएका हुन । श्रेष्ठ धरानका स्थानीय वासिन्दा हुन ।