खेलकुद महोत्सव शुरु खेलकुदको शहर घोषणा

छाल खवर
धरान,२५ मंसिर ः धरान खेलकुद मञ्चको आयोजनामा धरानमा पहिलो पटक १५ दिने धरान खेलकुद महोत्सव सुरु भएको छ ।

धरान–१६ स्थित धरान रंगशालाको तल्लो खेल मैदानमा शुरु भएको महोत्सवको फुटबल जगतका चर्चित व्यक्तित्व राजु काजि शाक्यले उद्घाटन गरेका थिए ।

शाक्यलाई खेल क्षेत्रमा गरेको ऐतिहासिक योगदानको सम्मानस्वरूप नगद रु.२५,००० सहित विशेष सम्मान प्रदान गरिएको थियो ।

शाक्यले एकै साथ कप्तान र मुख्य प्रशिक्षक भएर साफ च्याम्पियनसिप जिताएको गौरवशाली इतिहास रचेको भन्दै सम्मान गरिएको हो ।

महोत्सवमा कोरोना महामारीका कारण दिवंगत भएका शारीरिक सुगठनका नेपालकै प्रख्यात प्रशिक्षक स्वर्गीय राजभगत प्रधानङलाई पनि मरणोपरान्त सम्मान गरीएको थियो ।सो सम्मान स्वर्गीय राजभगतका छोरा कविरभगत प्रधानङलाई प्रदान गरिएको छ ।

प्रमुख अतिथि शाक्यको उपस्थितिमा आयोजक मञ्चले धरानलाई खेलकुदको शहर भनेर घोषणा समेत गरेको छ । समारोह्का सभापति तथा खेलकुद मंच धरानका अध्यक्ष किशोर राईले सरकारलाई दवाव सृजना गर्न खेलकुद शहर घोषणा गरिएको बताए ।

खेलकुद मञ्चका सितोरिया कराते, उसु, तेक्वान्दो खेलाडीहरुले आकर्षक खेल प्रदर्शन गरे । राई र लिम्बु समुदायको सांस्कृतिक नृत्य साकेला र च्याब्रुङले वातावरण रंगिन बनाएको थियो ।

महोत्सवको सबैभन्दा आकर्षक पक्ष भनेको धरानका खेलाडीहरूले पछिल्ला १०० वर्षमा जितेका मेडल, कप र प्रमाणपत्रहरूको भव्य प्रदर्शनी हो ।

मनोरञ्जनतर्फ, टोरा(टोरा, रसियन झुला, २० सिटे रोटेपिङ, २४ सिटे विशाल नाउ, ४० सिटे ड्रयागन राइड तथा बालबालिकाका लागि मिकी माउस, जम्पिङ ज्याकसहितका विभिन्न खेल सामग्री राखिएको छ । यी उपकरण भारतको पटना र अन्य स्थानबाट विशेष रूपमा ल्याइएका हुन् । यसले धरानको मनोरञ्जन क्षेत्रमा नयाँ अनुभव जोड्ने पनि खेलकुद मन्चका अध्यक्ष राईको भनाई छ ।

खेलकुद सम्वन्धी १२ वटा स्टल राखिने जानकारी दिए पनि उद्घाटन समारोहमा ति स्टलहरु देखिएनन् । दर्शकको सुरक्षालाई ध्यान दिँदै बीमा भने गरिएको छ । खानेपानी, बिजुली, सुरक्षा, स्वास्थ्य सेवा तथा ट्राफिक जस्ता आधारभूत ब्यवस्थापनमा चुस्त रहेको मञ्चका अध्यक्ष राईले बताए ।

प्रत्येक दिन दिउँसो १ देखि ३ बजेसम्म इन्जिनियरिङ र फुड टेक्नोलोजीका विद्यार्थीहरूले विज्ञान प्रदर्शनी गर्नेछन् भने धरानका विद्यालयहरूले संगीत र नृत्य प्रस्तुति दिनेछन् । साथै महोत्सवभर हाउजी(तम्बोला पनि खेलाइनेछ ।

उद्घाटन दिनदेखि समापनसम्म स्थानीय कलाकारलाई विशेष महत्व दिइनेछ । साथै एलिना चौहान, प्रताप दास, मन्त्र ब्यान्ड, ८८४८ ब्यान्ड, बबिना किराती, ज्योति मगरलगायतका कलाकारहरूको प्रस्तुति पनि रहनेछ ।

धरान खेलकुद महोत्सवले धरानवासीलाई कहिल्यै नबिर्सने नयाँ अनुभव दिने विश्वास लिइएको मञ्चका अध्यक्ष किशोर राईको भनाई रहेको छ ।

महोत्सव पुष १० गतेसम्म संचालन हुनेछ ।