लकडाउन अवधिको शुल्क नदिन समाजवादी विद्यार्थी युनियनको माग

छाल खवर
धरान,१३ असार ः समाजवादी विद्यार्थी युनियनले अभिभावकहरुलाई निजी विद्यालयलाई लकडाउन अवधिको शुल्क नतिर्न आग्रह गरेको छ ।
युनियनले शुक्रबार विज्ञप्ति निकालेर दैनिक १÷२ घण्टा पढाउने अनलाइन कक्षा संचालन गरेर अभिभावकहरुसँग शुल्‍क असुल्न खोज्नु ठीक नहुने बताएको छ ।
अनलाइन कक्षा सञ्चालन गरे पनि कतिपय विद्यार्थी इन्टरनेटको पहुँच बाहिर रहेको र स्मार्ट फोन र ल्यापटप किन्ने हैसियत अधिकांश विद्यार्थीहरुमा नहुने भएकोले शुल्क लिन अव्यवहारिक भएको अध्यक्ष रुपनारायण श्रेष्ठले विज्ञप्तिमार्फत बताएका छन् । युनियनले अभिभावकलाई आफ्ना बालबालिका सरकारी विद्यालयमा भर्ना गर्न पनि आग्रह गरेको छ ।
समाजवादी विद्यार्थी युनियनले शिक्षा र स्वास्थ्य क्षेत्रमा निजीकरण र व्यापारीकरणको अन्त्य गर्नुपर्ने पनि बताएको छ ।