के लालकिल्ला ढल्ला त ? अव के गर्लान धनकुटामा सुनीलबहादुर थापाले

भोला श्रेष्ठ
साउन,१४ काठमाडौं ः यतिवेला नेपाली राजनीतिमा सुनिल बहादुर थापाको पार्टी प्रवेशको समाचारले प्राथमिकता पाएको छ । सर्वै मिडियामा उनको समाचारले स्थान पाउन सफल भयो ।

उनले वावुको विरासतको रुपमा रहेको राष्ट्रिय प्रजातन्त्र पार्टी (राप्रपा)को महामन्त्री पदबाट राजीनामा मात्र गरेनन् ३१ जना केन्द्रीय सदस्यको नेतृत्व गर्दै मंगलवार नेपाली कांग्रेस पार्टीमा तामाझामका साथ प्रवेश गरेका थिए ।

राष्ट्रिय प्रजातन्त्र पार्टी (राप्रपा)का पूर्वमहामन्त्री सुनीलबहादुर थापाले २०१० सालताका बुबा सूर्यबहादुर थापा मोरङ कांग्रेसको कोषाध्यक्ष र त्यसपछि धनकुटाको जिल्ला सभापति भएको स्मरण समेत गर्न भ्याएका थिए ।

थापा परिवारले कांग्रेस छाडेको करिव ६ दशक भन्दा बढी भएको छ । उनले पार्टी प्रवेशका क्रममा कांग्रेससँग पुनः नाता जोड्न पाएकोमा सौभाग्य मिलेको संज्ञा दिए । अव पुरानो सम्वन्धलाई प्रगाढ वनाएर लैजाने विश्वास समेत व्यक्त गरे ।

किन प्रवेश गरे सुनिल कांग्रेसमा ?

सुनिल बहादुर थापाले किन काग्रेस नै प्रवेश गर्नु प¥यो त भन्ने विषयमा विश्लेषकहरु भन्छन – दुवैको संयोग मिलेको छ उनलाई बलियो पार्टीको ओत चाहिएको र कांग्रेसलाई बलियो नेता चाहिएकोले दुवैको स्वार्थ मिलेको हो यसमा दुवैको जीत भएको विश्लेषककको भनाई रहेको छ ।

कांग्रेसले अहिलेसम्म धनकुटा–१ बाट कुनैपनि निर्वाचनमा जित हासिल गर्न सकेको छैन । आफूले निर्वाचन जित्न नसकेको क्षेत्र नवप्रवेशी नेतालाई दिन केही अफ्ठ्यारो नभएको कांग्रेसका नेता स्वय स्विकार गर्छन ।

पार्टी फरक भएपनि गत निर्वाचनमा पनि कांग्रेसले थापालाई सघाएको थियो । प्रतिनिधिसभा सदस्य निर्वाचनमा नेकपाका राजेन्द्रकुमार राईसँग कडा प्रतिष्पर्धा गरेका थापाले २६ हजार ८७४ मत पाएका थिए । यो राप्रपाको मात्रै भोट थिएन, कांग्रेस समर्थकले पनि उनलाई मत दिएका थिए ।

थापाको प्रवेशले कांग्रेसमा पार्ने प्रभाव

थापाको पार्टी प्रवेशले कांग्रेसलाई धनकुटा जिल्लामा भन्दा अन्य जिल्लामा खासै प्रभाव नपार्ने धनकुटामै सीमित हुने कांग्रेसका एक नेता बताउँछन् । ‘यो राष्ट्रिय वा क्षेत्रीय राजनीतिमा प्रभाव पार्ने समीकरण होइन’, उनी भन्छन्, ‘धनकुटामा भने निर्वाचन परिणाममा नै फरक पार्ने उनको दावी रहेको छ ।

थापालाई भित्र्याउन धनकुटा जिल्लाका कांग्रेस नेताहरू नै लागेकाले चुनावमा अन्तरघातको सम्भावना न्यून रहेको ती नेता बताउँछन् । थापाले प्रत्यक्षमा जितेपछि अरुले समानुपातिकमा अवसर पाउने उनको भनाइ छ ।राजनीतिमा होमिएकै वर्ष २०७० सालको संविधानसभा निर्वाचनमा थापा धनकुटा–१ बाट निर्वाचित भएका थिए । त्यसपछि सुशील कोइराला नेतृत्वको सरकारमा वाणिज्य मन्त्री बनेका थिए ।

नेकपा भन्छ लालकिल्ला ढाल्न होइन हल्लाउन समेत सक्दैन ।

सुनिल बहादुर थापाको पार्टी प्रवेशबाट नेपाली कांग्रेसका कार्यकर्ताहरु हौसिएको वेला नेकपाले भने खासै महत्व दिएको छैन । थापाको कांग्रेस प्रवेशले नेकपालाई खासै चुनौति नभएको दावी गरेको छ ।

विगत वर्षहरु देखि नै कांग्रेसले राप्रपाका नेता सूर्य बहादुर थापालाई सघाउदै आएको र पछिल्लो निर्वाचनमा पनि उनका छोरा सुनिल वहादुर थापालाई सघाएको थियो । तर उनी नेकपाका अध्यक्ष राजेन्द्र कुमार राईसँग ११ हजार भन्दा माथिको मतान्तरमा पराजय भएका थिए । त्यसवेला कांग्रेस,समाजवादी राप्रापा लिम्वुवानको लगायत ६ वटा पार्टीको समिकरण वनेको थियो ।

त्यसअघि नेपाली कांग्रेसबाट निर्वाचनमा प्रतिष्पर्धी वनेका टिका भण्डारी,आनन्द सन्तोषी राई र मनोहर नारायण श्रेष्ठ लगायतहरु भारी मतान्तरले नेकपाएमालेसंग पराजित वनेका थिए ।

नेकपाको मत र संगठनलाई कसैले हल्लाउन र चलाउन नसक्ने नेकपाका धनकुटा जिल्ला अध्यक्ष राजेन्द्र कुमार राईको दावी रहेको छ ।उनले भने –हामी हिजो देखि नै पराजित गर्दै आएका हौं अहिले पनि हाम्रो संगठनात्मक अवस्था उस्तै छ जनता हाम्रो पक्षमा चटान झै उभिएकाछन् । हाम्रो लालकिल्ला कसैले ढलाउन होइन हल्लाउन समेत सक्दैन ।