बिपी प्रतिष्ठान धरानलाई विश्वविद्यालय बनाइने

धरान,३२ साउनः वीपी कोइराला स्वास्थ्य विज्ञान प्रतिष्ठान धरानलाई विश्व विद्यालय बनाउनका लागि ९ सदस्यीय कार्यदल गठन गरेको छ ।

४४औँ सिनेट बैठकले उपकुलपति प्रा.डा. ज्ञानेन्द्र गिरीको संयोजकत्वमा सो समिति गठन गरेको हो ।

सहकुलपति तथा स्वास्थ्य तथा जनसंख्यामन्त्री भानुभक्त ढकालको अध्यक्षतामा बसेको बैठकले प्रतिष्ठानलाई छुट्टै विश्वविद्यालयमा रूपान्तरण गर्ने प्रस्ताव पास समेत गरेको छ । प्रतिष्ठानलाई थप विकास र विस्तार, विशिष्टिकृतपूर्ण विश्वविद्यालयमा रूपान्तरणका लागि योजना र नियम तर्जुमा गर्न कार्यदल बनाइएको हो ।

उक्त कार्यदलमा प्रा. डा. उपेन्द्र कोइराला, प्रा. डा. मोहनचन्द्र रेग्मी, प्रा. डा. मधुर भट्टराई, प्रा. डा. बालकृष्ण भट्टराई, धरान उपमहानगरकी उपमेयर मञ्जु भण्डारी छन् । अन्य तीनजना सदस्य थप्ने गरी कार्यदल बनाइएको हो ।

बैठकले प्रष्ष्ठिानका शिक्षाध्यक्ष प्रा.डा. खनालको संयोजकत्वमा प्रतिष्ठानको नियमावली मस्यौदा समिति समेत गठन गरेको छ । समितिलाई प्रतिष्ठानको आर्थिक,शैक्षिक, कर्मचारी, लगायतका नियमवाली बनाउने जिम्मेवारी दिइएको छ ।

बैठकले आर्थिक वर्ष ०७७÷७८ का लागि २ अर्ब ९८ करोड ६७ लाखको बजेट समेत पास गरेको प्रतिष्ठानका रजिष्ट्रार डा. मोहन चन्द्र रेग्मीले वताए ।

प्रतिष्ठान हाताभित्र ट्रमा सेन्टर र मानव अंग प्रत्यारोपण अस्पताल निर्माण गर्ने निर्णय गरेको छ । स्वास्थ्यमन्त्री ढकालको विशेष प्रस्तावमा मोरङको सुन्दरहरैँचामा छुट्टै सरुवारोग अस्पताल निर्माण गर्ने निर्णय गरेको छ ।

बैठकले पुनरावेदन आयोगको रिक्त पदमा प्रदेश १ का प्रदेश सभा सदस्य राजकुमार ओझा र प्रा.डा. दिव्यसिंह साहलाई सिफारिस गरेको छ ।

प्रतिष्ठानको जग्गा भूमाफियालाई दिन लागेको भन्दै नेपाली कांग्रेसको दुइ भातृसंगठनले चरणवद्ध आन्दोलन गर्दै आएका थिए । तर सिनेट वैठकले भने अस्पताल निर्माण गर्ने निर्णय गरेको छ ।

अस्पतालको आम्दानीको स्रोत वढाउने कार्यका लागि उपयोग गर्ने निर्णय भएको रजिष्ट्रार रेग्मीले वताएकाछन् ।