हिउँदे अधिवेशन तयारीमा सभामुख भण्डारी व्यस्त

छाल खवर
धरान,२७ पुष ःसत्तारुढ दलको आन्तरीक विवादको समयमा आगामी माघ ७ गते दिनको २ बजेबाट प्रारम्भ हुन लागेको प्रदेशसभाको हिउँदे अधिवेशन सहज सञ्चालन गर्न सभामुख प्रदीपकुमार भण्डारीले कानुनी परामर्श थाल्नु भएको समाचार स्रोतले बताएको छ ।

स्रोतका अनुसार सभामुख भण्डारीले आईतवार प्रदेशसभाको प्रमुख प्रतिपक्ष दल नेपाली कांग्रेसका संसदिय दलका नेता राजिव कोईराला, प्रमुख सचेतक केदार कार्कीसँग परामर्श गर्नु भएको थियो ।

आईतवार नै सभामुख भण्डारीले मुख्यमन्त्री शेरधन राई र सामाजिक विकास मन्त्रालयको कार्यभार सम्हालेका आन्तरिक मामिला मन्त्री हिकमतकुमार कार्कीसँग आफ्नै कार्यकक्षमा भेट गरी आवश्यक परामर्श गर्नुभएको बताइएको छ ।

प्रदेश सरकारका आर्थिक मामिला तथा योजना मन्त्री ईन्द्र आङ्बोलाई मुख्यमन्त्री राईले पदबाट बर्खास्त गरेको भोली पल्ट नै मुख्यमन्त्री राई विरुद्ध प्रदेशसभा सचिवालयमा अविश्वासको प्रस्ताव दर्ता भएगरीएपछि कडा आन्तरीक अन्तरसंघर्ष चलिरहेको छ । अन्तर विरोध यतिसम्मकी एक पक्षले अर्को पक्षलाई कार्वाही गर्ने अवस्थासम्म आईपुगेको छ ।

कठिन मोडमा रहेको पार्टीको आन्तरीक अन्तरद्धन्द्धका वीचमा तय गरीएको हिउदे अधिवेशनलाई सफल वनाउन सभामुख भण्डारी छलफल र भेटघाटमा व्यस्त रहनु भएको छ ।

सभामुख भण्डारीले सत्तारुढ दल भित्र किचलो चर्किरहेको बेला शुरु हुन लागेको प्रदेशसभाको हिउँदे अधिवेशन सहज सञ्चालन गर्न प्रदेशका मुख्यन्यायाधिवक्त चुडाराज आचार्यसँग पनि आईतवार नै आफ्नै कार्यकक्षमा भेट गर्नु भएको बुझिएको छ । त्यसैगरि आइतवार नै प्रदेशसभामा जनता समाजवादी पार्टीका संसदिय दलका नेता जयराम यादवसँग पनि उहाँले भेट गर्नु भएको स्रोतले बतायो ।

स्रोतका अनुसार सभामुख भण्डारीले हिउँदे अधिवेशनको नजिकिदै गर्दा परामर्शको क्रम तिब्र बनाउनु भएको छ ।

नेपाल कम्युनिष्ट पार्टी (नेकपा) आन्तरिक विवाद व्यवस्थापन गर्न नसक्दा विभाजनको संघारमा पुगेको अवस्थामा यस्को प्रभाव प्रदेशसभामा पनि देखिएको छ । प्रतिनिधी सभा विघटन सँगै अलग अलग भेला तथा बैठक गर्दै विभाजनको अभ्यासमा रहेका नेकपाका दुई समूहको अनतरविरोधले प्रदेशसभाको हिउँदे अधिवेशन प्रभावित हुने संकेत देखिएको छ ।

एक पक्षले अविस्वासको प्रस्ताव लिएर सत्ताच्युत गर्ने तयारी गरीरहेको छ भने अर्को पक्षले अविस्वासको प्रस्तावको सामान्य वहुमतबाट सामाना गर्ने भन्दै आन्तरीक तयारी गरीरेको स्रोतको भनाई रहेको छ ।