सुनसरी क्षेत्र नम्वर १ मा निर्वाचन तयारी तीव्र– निर्वाचन कार्यालय

छाल खवर
धरान,१३ माघः निर्वाचन अधिकृतको कार्यालय सुनसरी १ ले सुनसरी क्षेत्र नं १ मा हुने प्रतिनिधिसभा सदस्य निर्वाचनको तयारी तीव्र रुपमा अगाडि बढेको जनाएको छ ।

कार्यालयले मंगलबार पत्रकार सम्मेलनको आयोजना गरी निर्वाचन सम्बन्धी समग्र जानकारी सार्वजनिक गरेको हो ।

१ लाख ५० हजार ३सय ९३ मतदाता रहेको सुनसरी १ मा ४१ मतदानस्थल, १६१ मतदान केन्द्र रहेको निर्वाचन अधिकृतको कार्यालयका अधिकृत दिव्यराज घिमिरेले जानकारी दिएका छन् ।

घिमिरेका अनुसार यस निर्वाचन क्षेत्रमा धरान उपमहानगरपालिकाका २० वटा वडा, बराहक्षेत्र नगरपालिकाका वडा नं.१ देखि ५ सम्म तथा रामधुनी नगरपालिकाका वडा नं. ६ र ७ समेटिएका छन् ।

कार्यालयले सर्वदलीय वैठक गरी निर्वाचनलाई स्वतन्त्र, निष्पक्ष, मर्यादित र भयमुक्त वातावरणमा सम्पन्न गर्ने तथा आचारसंहिता पूर्ण रूपमा पालना गर्ने सहमति गरिएको समेत जानकारी दिएकाछन् ।

निर्वाचन अधिकृतको कार्यलयका अनुसार पहिलो मनोनयनपत्र नेपाल मजदुर किसान पार्टीका महेश श्रेष्ठले दर्ता गराएका थिए भने अन्तिम मनोनयन मितेरी पार्टी नेपालका डा. रक्ष कुमार राईले दर्ता गराएका थिए । पार्टीतर्फबाट १९ जना र स्वतन्त्र ७ जना गरी जम्मा २६ जना उम्मेदवारको मनोनयन दर्ता भएको छ ।

मनोनयनका क्रममा कुनै पनि उम्मेदवारविरुद्ध उजुरी नपरेको, सबै उम्मेदवारको योग्यता पूरा भएको र कसैले पनि उम्मेदवारी फिर्ता नलिएको निर्वाचन अधिकृतको कार्यालयले जनाएको छ ।

माघ ९ गते सबै २६ जना उम्मेदवारको अन्तिम नामावली प्रकाशित गरी निर्वाचन चिन्ह प्रदान गरिएको थियो भने माघ १० गते उम्मेदवारलाई परिचयपत्र वितरण गरिएको थियो ।

अब माघ १२ गतेपछि उम्मेदवार तथा उनीहरूका प्रतिनिधिसँग आचारसंहिता सम्बन्धी अन्तरक्रिया, मतदान केन्द्रको अनुगमन तथा निरीक्षण, समस्या पहिचान र समाधानका उपाय अवलम्बन गर्ने कार्य अघि बढाइने अधिकृत अधिकारीले जनाए । त्यो कुन दिन गरिने भन्ने कुरा ठोस रुपमा बताएनन् ।

निर्वाचनका लागि मतदान अधिकृत १६१, सहायक मतदान अधिकृत १६१, सहायक कर्मचारी ४८३, सहयोगी कर्मचारी १६१ र स्वयंसेवक ४८३ गरी जम्मा १,४४९ जना कर्मचारी खटाइनेछन् । सुरक्षाको व्यवस्था भने जिल्ला सुरक्षा समितिले गर्नेछ ।

राजनीतिक दलहरु सौहार्दापूर्ण सहयोग गरेको अधिकृत अधिकारीले बताए । उनले आचारसंहिता र अनुगमन जस्ता क्रिया अब अघि बढाईने समेत बताए ।